Skráning starfsfólks

XII. KAFLI – Reglugerðir um Bikarkeppni

a) Bikarkeppni SSÍ í sundi

1. grein

Bikarkeppni SSÍ 1. og 2. deild skal haldin ár hvert og fer hún fram í 25 metra laug.

2. grein 

Liðum í Bikarkeppni SSÍ 2026 er raðað í deildir útfrá árangri í Bikarkeppni árinu á undan.

Fyrir næstu ár:

Liðum er raðað í deildir útfrá styrkleika liðanna. Samanlagður stigafjöldi liðanna ræður og eru afrek úr 25m laug frá 1. júní til 31. desember árið á undan keppni notuð til grundvallar. Þessi grein er enn í mótun og vinnur skrifstofa SSÍ að því að útfæra þetta nákvæmlega útfrá því hvað gagnagrunnur SSÍ og tölvukerfi býður uppá. Stjórn SSÍ mun gefa út í það minnsta mánuði fyrir keppni hvernig röðunin verður.

3. grein 

Lið tilkynna þátttöku í Bikarkeppni SSÍ með minnst 15 daga fyrirvara. Tilkynningin er bindandi.

Skráningum í greinar skal skila tveimur sólarhringum fyrir upphaf móts og verður farið með skráningar sem trúnaðarmál þangað til að þær verða gerðar opinberar 30 mínútum fyrir hvern mótshluta.

4. grein

Í 1. deild eru 3 lið, hvert lið er með 2 keppendur í hverri einstaklingsgrein og 1 boðsundssveit í hverri boðsundsgrein. Í 2. deild eru að hámarki 6 lið, hvert lið er með 1 keppenda í hverri einstaklingsgrein og 1 boðsundssveit í hverri boðsundsgrein. Náist ekki 6 lið í 2. deild hefur stjórn SSÍ heimild til að bjóða öðrum félögum að skrá B- eða C-lið til þátttöku. Þessi lið keppa utan stigakeppni og verðlauna.

Hver keppandi má synda að hámarki 4 einstaklingsgreinar og 3 boðsund í báðum deildum. Allir keppendur skulu vera 12 ára eða eldri á árinu. Mótshlutar 1. deildar og 2. deildar eru aðskildir.

5. grein

Í 1. deild skal fjöldi keppenda af hvoru kyni vera á bilinu 8-12 og í 2. deild á bilinu 5-8 frá hverju liði. Nafnalisti fyrir keppendur skal berast SSÍ með skráningum.

Frestur til að skila inn boðsundum og gera breytingar á liðsskipan rennur út 60 mínútum fyrir upphaf hvers keppnishluta. Endanlegar skráningar verða aðgengilegar 15 mínútum síðar, eða eins fljótt og auðið er.

6. grein

Sundsamband Íslands tilkynnir dagsetningu og mótsstað með minnst tveggja mánaðar fyrirvara. Þá daga sem mótið fer fram er óheimilt að stofna til annarrar sundkeppni á vegum sambandsaðila SSÍ.

7. grein

Dagskrá mótsins er sú sama fyrir báðar deildir, tveir keppnishlutar á einum degi.

8. grein

Mótið er stigakeppni milli félaga. Stig verða veitt út frá sætum út frá tíma.

Stigahæsta karlalið og stigahæsta kvennalið í 1. deild hljóta sæmdarheitið BIKARMEISTARI ÍSLANDS Í SUNDI í karla- og kvennaflokkum og gullverðlaun. Liðið sem hreppir 2. sætið í 1. deild vinnur silfurverðlaun. Á sama hátt skal verðlauna tvö efstu liðin í karla og kvennaflokki í  2. deild, 1. sætið hreppir gullverðlaun og 2. sætið silfurverðlaun. Ef lið eru jöfn að stigum skulu úrslit úr boðsundum ráða sætaröðun þeirra. Ef lið eru enn jöfn skal hlutkesti ráða röð liða.

9. grein

Tæknifundi skal halda í samræmi við gildandi reglur.

 Ágúst 2026