Glæsilegur árangur náðist á Cube-móti SH sem fram fer í Ásvallalaug nú um helgina, en tvö Íslandsmet hafa fallið á mótinu, sem og tvö Íslandsmet unglinga.

Birnir Freyr Hálfdánarson gerði sér lítið fyrir og bætti 23 ára gamalt Íslandsmet Arnar Arnarsonar í 200 metra fjórsundi. Birnir synti á tímanum 1:57,57 og bætti þar með met Arnar um 0,34 sekúndur. Gamla metið, 1:57,91, hafði staðið síðan í mars árið 2003.

Símon Elías Statkevicius lét einnig til sín taka og bætti eigið Íslandsmet í 50 metra skriðsundi. Símon synti á tímanum 21,73 sekúndum og bætti þar með tæplega ársgamalt met sitt, 21,75 sekúndur, um tvo hundraðshluta úr sekúndu.

Denas bætti síðan tvö Íslandsmet unglinga um helgina. Það fyrra gerði hann í 50 metra skriðsundi þegar hann sló sitt eigið Íslandsmet unglinga um sex hundraðshluta úr sekúndu er hann kom í bakkann á 22,50. Seinna metið sló hann í 100 metra skriðsundi. Denas synti þá á tímanum 49,32 og bætti gamla metið, sem Birnir Freyr átti, um fimm hundraðshluta úr sekúndu.

Virkilega flottur árangur hjá þeim Birni, Símoni og Denas um helgina!