Þrír Íslendingar kepptu í undanrásum á öðrum degi Evrópumeistaramótsins í 50 metra laug í París í morgun. Guðmundur Leo Rafnsson átti afar öflugt sund í 200 metra baksundi og synti aðeins ellefu hundruðustu úr sekúndu frá sínum besta tíma.

Jóhanna Elín Guðmundsdóttir reið á vaðið fyrir íslenska liðið þegar hún keppti í 50 metra flugsundi. Hún synti á 28.02 og varð í 50. sæti af 51 keppanda.

Næst kom Birgitta Ingólfsdóttir, sem var að keppa í fyrsta sinn á mótinu. Hún synti 100 metra bringusund á 1:12.66 og hafnaði í 42. sæti af 45 keppendum.

Að lokum stakk Guðmundur sér ofan í laugina í 200 metra baksundi, sinni aðalgrein á mótinu.

Guðmundur fór mjög hratt af stað, var á undan sínum besta tíma eftir fyrstu 100 metrana og leiddi riðilinn. Hann hélt áfram af miklum krafti og var enn með þeim fyrstu í riðlinum þegar 150 metrar voru að baki. Á síðustu 50 metrunum kom aðeins þreyta í líkamann og hann kom í bakkann á 2:01.42, aðeins ellefu hundruðustu úr sekúndu frá sínum besta tíma. Hann hafnaði í 33. sæti af 39 keppendum.

Þrátt fyrir góðan tíma var Guðmundur gjörsamlega búinn eftir sundið.

Guðmundur segir að ætlunin hafi verið að fara enn hraðar til baka eftir fyrstu 100 metrana og hann hafi fundið vel fyrir því í dag hversu mikið hann hafði lagt á sig.

Þar með lauk keppni Íslendinga í undanrásum á öðrum degi EM50, en áfram verður keppt í París á morgun. Þá eiga þrír Íslendingar sæti í undanrásum: Vala Dís Cicero í 200 metra skriðsundi, Birnir Freyr Hálfdánarson í 100 metra flugsundi og Einar Margeir Ágústsson í 200 metra bringusundi.

Snæfríður dregur sig úr keppni

Snæfríður Sól Jórunnardóttir hefur ákveðið að draga sig úr keppni það sem eftir lifir móts vegna veikinda.

Snæfríður keppti í 100 metra skriðsundi á fyrsta degi mótsins og átti einnig eftir að keppa í 200 og 50 metra skriðsundi.

Við óskum Snæfríði góðs bata og vonumst til að sjá hana aftur í lauginni fljótlega.