RIG byrjar vel - bætingar og spennandi úrslit
Sund á Reykjavík International Games (RIG) hófst í Laugardalslaug kl 16:00 í dag, föstudag, með undanrásum og beinum úrslitum. Þrátt fyrir að engin met hafi fallið fyrsta daginn var keppnin afskaplega jöfn og lofar góðu fyrir komandi daga mótsins.
Helstu afrek dagsins voru í lengri greinunum þar sem synt var í beinum úrslitum. Hólmar Grétarsson (SH) sigraði 400m fjórsund karla á tímanum 4:36.44, og Eva Margrét Falsdóttir (ÍRB) vann 400m fjórsund kvenna á 5:08.63. Í 1500m skriðsundi karla stóð Andri Már Kristjánsson (SH) uppi sem sigurvegari á tímanum 17:17.98, á meðan Katja Lilja Andriysdóttir (SH) vann 800m skriðsund kvenna á 9:13.98.
Í 50m skriðsundi karla sýndi Denas Kazulis (ÍRB) mikinn styrk þegar hann synti á 23.87 sekúndum, aðeins hálfri sekúndu frá mótsmeti sem hefur staðið síðan 2006 og er í eigu Arnar Arnarsonar (23.37). Það má búast við mikilli spennu í úrslitum í þeirri grein annað kvöld. Svipaða sögu er að segja í 50m skriðsundi kvenna, þar sem Britta Koehorst (Hollandi) synti á 25.29, aðeins 0.17 frá mótsmetinu 25.12, sett af goðsögninni Therese Alshammar árið 2006.
Aðrir sigurvegarar dagsins sem vert er að nefna:
- Jón Ingi Einarsson (Óðinn) sigur í 50m baksundi og 400m fjórsundi karla (15 ára og yngri)
- Auguste Balciunaite (SH) sigur í 50m bringusundi kvenna (15 ára og yngri)
- Þorgerður Freyja Helgadóttir (Breiðablik) sigur í 400m fjórsundi kvenna (15 ára og yngri)
- Kristjón Hrafn Kjartansson (SH) sigur í 1500m skriðsundi karla (15 ára og yngri)
- Guðrún Ísold Harðardóttir (ÍRB) sigur í 800m skriðsundi kvenna (15 ára og yngri)
Í flokki fatlaðra voru sigurvegarar dagsins:
- Emelía Ýr Gunnarsdóttir (S14, Fjörður) sigur í 50m baksundi og 50m flugsundi kvenna
- Thelma Björg Björnsdóttir (SB5, ÍBR) sigur í 50m bringusundi kvenna
- Róbert Ísak Jónsson (S14, SH) sigur í 50m flugsundi karla
- Jón Margeir Sverrisson (S14, Óðinn) sigur í 50m skriðsundi karla
- Sigrún Kjartansdóttir (S18, Fjörður) sigur í 50m skriðsundi kvenna
Keppnin heldur áfram á morgun, laugardag, með undanrásum kl. 9:30 og úrslitum síðdegis. Spennandi keppni framundan í Laugardalslauginni.
