Þórunn Kristín Guðmundsdóttir úr Ægi gaf sjálfri sér góða afmælisgjöf í dag þegar hún synti 400 metra skriðsund á 6:10,59 hér á EM garpa. Þetta er nýtt garpamet í hennar aldursflokki sem er 45-49 ára og mikil bæting á gamla metinu sem var samkvæmt metaskrá SSÍ 6:40,29 og Þórdís Pálsdóttir átti. Þórunn Kristín synti jafnt sund og ákveðið allan tímann, en hún varð 47 ára í dag. Til hamingju með daginn Þórunn Kristín.
Karen Malmquist er mætt til London og syndir á morgun hér á EM garpa. Hún er áttundi Íslendingurinn sem tekur þátt í mótinu að þessu sinni.
Það er skammt stórra högga á milli. Guðmunda Ólöf Jónasdóttir úr UMSB sem er betur þekkt sem Mumma Lóa, gerði sér lítið fyrir og sló garpametið sem Ragna hafði sett í riðlinum á undan. Metið sem Ragna átti var 2:00,60 en Mumma Lóa synti greinina á 1:35,90 í aldursflokknum 65-69 ára. Frábær árangur og gaman að fylgjast með Íslendingunum hér á Evrópumóti garpa í London..png?proc=100x100)
Ragna María Ragnarsdóttir úr Ægi var að ljúka 100 metra skriðsundi í aldursflokknum 65-69 ára og bætti tímann sinn um rúmar 2 sekúndur þegar hún synti á 2:00,60. Um leið setti hún nýtt íslenskt garpamet en gamla metið hennar var 2:02,61 og var sett árið 2013.
Kári Geirlaugsson úr ÍA setti áðan nýtt garpamet í 100 metra skriðsundi í aldursflokknum 65-69 ára þegar hann synti á tímanum 1:15,00 sem er veruleg bæting á fyrra meti sem var 1:28,26 og Ingimundur Ingimundarson átti. Kári synti fallegt sund með þéttum tökum og hélt vel út allt sundið. Fínn árangur hjá Kára hér á EM garpa í London.
Rémi Spilliart úr Ægi lauk 50 metra flugsundi í aldursflokknum 55-59 á tímanum 35,88, sem er aðeins frá garpameti Guðjóns Guðnasonar en það er 34.32. Rémi var langfyrstur í sínum riðli og lét vel af sér að loknu sundi.Kári Geirlaugsson úr ÍA setti nýtt íslenskt garpamet í 400 metra skriðsundi hér á EM garpa í London. Hann syndir í aldursflokki 65-69 ára og synti greinina á 6:18,63 sem er mikil bæting á fyrra meti, en það var samkvæmt metaskrá SSÍ 9:50,63. Kári var nokkuð ánægður með sig eftir sundið og sagði það hafa tekist betur en hann þorði að vona.
Finni Aðalheiðarson úr Ægi setti nýtt garpamet í 100 metra bringusundi á EM garpa sem fram fer í London þessa vikuna. Hann syndir í aldursflokknum 45-49 ára og synti greinina á 1:20,92 sem er töluvert betra en hann átti fyrir samkæmt metaskrá SSÍ. Gamla metið hans er 1.22,18 sett árið 2014.
Mumma Lóa og Hildur Karen mættar til London. Finni og Kári synda í dag.
Finni Aðalheiðarson og Ragna María Ragnarsdóttir hafa nú dýft sér í laugina hér í London. Þau syntu bæði 50 metra bringusund. Finni setti nýtt garpamet í greininni í aldursflokknum 45-49 ára á tímanum 0:35,46. Gamla metið var frá 2014 0:35,70. Ragna synti á tímanum 1:10,33 í aldursflokkinum 65-69 ára sem er eitthvað frá hennar eigin meti sem er 1:06,89.
Þórunn Kristín Guðmundsdóttir gerði vel í 200 metra skriðsundi og synti á tímanum 2:56,94 sem er nýtt islenskt garpamet í hennar aldursflokki 45-49 ára. Gamla metið átti Hrund Baldursdóttir frá Selfossi 3:04,76 sem sett var árið 2013. Myndirnar sýna Þórunni fyrir sundið í lok sundsins og þegar hún uppgötvaði að hún hefði náð metinu.
Rémi Spilliart úr Ægi var rétt í þessu að setja nýtt garpamet í sínum aldursflokki á EM garpa í London. Tíminn hans er 2:41,04.
